ശിരോ രോഗികള്‍ക്കുള്ള ഭക്ഷണക്രമവും ജീവിതക്രമവും ആയുര്‍വേദം നിര്‍ദ്ദേശിക്കുന്നുണ്ട്.  ആട്ടിന്‍മാംസം, പഴകിയ ചെന്നല്ലരി, ചെറുപയര്‍, പഴം, മുതിര, ഉഴുന്ന്, പഴകിയ നെയ്യ്, ചൂടുപാല്‍, മുന്തിരി, നെല്ലിക്ക, പടവലങ്ങ, മാതളപ്പഴം എന്നീ ഭക്ഷണങ്ങള്‍ ശിരോരോഗികള്‍ക്ക് ഉത്തമമാണ്.  ദുഷിച്ച ജലം, പകലുറക്കം, അമിത മാനസിക വിക്ഷോഭം, വേഗധാരണം, പുളി, എരിവ്, ഉപ്പ് എന്നീ രസങ്ങളടങ്ങിയ ഭക്ഷണങ്ങളുടെ അമിതോപയോഗം എന്നിവ ശിരോ രോഗികള്‍ക്ക് നിഷിദ്ധമാണ്.    

       ശിരസ്സിനെ സംബന്ധിക്കുന്ന രോഗങ്ങള്‍ക്കുള്ള പ്രധാന ചികിത്സ നസ്യം ആണ്.  പ്രഭാതത്തിലാണ് നസ്യം ചെയ്യുന്നത്.  രോഗിയെ രോഗത്തിനനുസരിച്ചുള്ള എണ്ണ പുരട്ടി വിയര്‍പ്പിക്കുകയാണ് ആദ്യം.  എന്നിട്ട് മൂക്കിലൂടെ ഔഷധപ്രയോഗം നടത്തുന്നു.  നസ്യം കൂടാതെ ശിരോവസ്തി, ശിരോധാര തുടങ്ങിയ ചികിത്സാ ക്രമങ്ങളും നടത്താറുണ്ട്.  ആയുര്‍വേദം ആദ്യം ചെയ്യുക രോഗകാരണം കണ്ടെത്തി അത് ഒഴിവാക്കുകയാണ്.  രോഗകാരണങ്ങള്‍ ഉപേക്ഷിച്ചിട്ടും മാറാത്തവയ്ക്കാണ് ദോഷാനുസരേണ ചികിത്സ നടത്തുന്നത്.